ဘာကြောင့် ဘုရားရှင်က ဂုဏ်တော်ကို ပွားခိုင်းရသလဲ..?
**********
ဒို့စိတ်တွေက ရိုင်းလွန်းလို့ 
ဒီအတိုင်းမထားနိုင်လို့
ဘုရားဂုဏ်ကို အာရုံပြုပြီးတော့ 
ဒို့ရဲ့ရိုင်းတဲ့စိတ်ကို
ဘုရားအာရုံလေးနဲ့တွဲပြီးတော့ကပ်ပြီးတော့
ယဉ်အောင် ကျင့်ယူရတာထင်တယ် ။




အဲဒါဗျ ဒို့ချည်းမနိုင်လို့ 
ဘုရားနဲ့ကပ်ယူရတာ ။

အဲဒီဂုဏ်တော်တွေပွားခြင်းတို့မည်သည်မှာ
' သဒ္ဓါ ' နိုးအောင်လို့ နှိုးပေးတာ ။

ဒို့ စာလိုတော့ လျက်ဆားများဆိုရင် 
ပုလင်းအထဲ ထဲမှာ လျက်ဆားထည့်ထားတယ်
အပြင်ပုလင်းမှာ ပုလင်းဘူးပတ်ကလေး မရှိဘူးလား 
ဆေးရဲ့အာနိသင်ဆိုပြီး မရေးဘူးလား ။

ဘာတုန်း 
သလိပ်ခဲသော် သွေးကျသော်နဲ့ 
မပါဘူးလား ?
( ပါ ပါတယ်ဘုရား )

သလိပ်ကပ်သော် ဘယ့်နှယ်
ရင်ပြည့်သော် ဘယ်နှယ့်
ကွမ်းရွက်ပြုတ်ရည်ကြီးနဲ့ ဘယ်လို
အညွှန်းမရှိဘူးလား ?
( ရှိပါတယ် ဘုရား )

ဒို့ အညွှန်းလေးကို ဖတ်ကြည့်တာက
ဆေးသောက်စေချင်လို့ ။

အဲ့တော့ အညွှန်းဖတ်ကြည့်ရုံနဲ့ 
ဘယ့်နှယ်တုန်း
သလိပ်ကပ် ပျောက်သလား ?
( မပျောက်ပါဘုရား )

သလိပ်ကပ်ပျောက်ချင်တော့ 
ဘာလုပ်ရမှာတုန်း ?
(ဆေးသောက်ရမှာပါ ဘုရား )

အဲ့တော့
' အရဟံ '
' ပူဇော်အထူးကို 
ခံယူတော်မူထိုက်သောဘုရား '
သူ့ဂုဏ်လေးနဲ့ကိုယ့်စိတ်ကို 
တွဲထားရတာထင်တယ် ။

အမြဲတမ်းသာပြောနေ နှိုးဆော်နေ
' ပူဇော်အထူးကို 
ခံယူတော်မူထိုက်သောဘုရား '
ပါဠိလို ' အရဟံ ' နေမှာပေါ့လေ ။
( မှန်ပါ ဘုရား )

ဒို့ အဲဒါလေး အာရုံပြုနေတဲ့အချိန်မှာ
အဟောင်းကိလေသာ တွေးသာသလား ?
( မတွေးသာပါ ဘုရား )
အသစ်ကိလေသာနောက်ကော 
ပြေးလိုက်မိသလား ?
( မလိုက်မိပါ ဘုရား )

အဲဒါတစ်ချက်မှတ်လိုက် 
တစ်ချက်ဒီဂုဏ်တော်ပွားလိုက်လို့
တစ်ချက်ကိလေသာ 
တစ်ခါတည်းပျောက်ထွက်သွားတာ ။

အဲဒါ ဒီသတိစိတ် ဘုရားဂုဏ်စိတ်က
ကိလေသာကို ရှို့မြိုက်ပစ်လိုက်တာ 
' ဈာန် ' လို့ခေါ်တယ် ။

' ဈာန် ' ဆိုတာ ကိလေသာကို 
လောင်မြိုက်ပစ်လိုက်
တာလေ ။
တစ်ချက်မှတ်လိုက်တဲ့အချိန် 
အဟောင်းလည်းပျောက်ပြီ
အသစ်လည်းပျောက်ပြီ အဲဒါ ' ဈာန် ' ပဲဗျ ။

အဲဒါ ဗုဒ္ဓါနုဿတိနဲ့ 
အနုဿတိဈာန်ဝင်စားတာ ။

ဒို့ ပထဝီကသိုင်းတို့ ဘာတို့ဆိုတာကျတော့
သမာဓိကနေ ပညာကိုတန်းသွားမှာ ။
ဒို့ ဘုရားဂုဏ်ကကျတော့ သဒ္ဓါကနေ
ပညာကိုတက်မှာ ။

အဲ့တော့ 
' အရဟံ ' လို့ ဒို့ကပွားလိုက်ရင်
' အရဟံ ' အကြောင်းမသိလည်း အရေးမကြီးဘူး
လိုချင်တာက စိတ်ကလေး
ပုတီးလုံးနဲ့စိတ်နဲ့ထိတဲ့နေရာဖြစ်ဖြစ်
အရဟံဂုဏ်ဆိုတဲ့ ဘုရားဂုဏ်မှာ 
စိတ်ကလေးထိနေလို့ဖြစ်စေ
ဒါပဲလိုချင်တာ သိတာမသိတာ 
လိုရင်းမဟုတ်ဘူး ။

အဟောင်းမတွေးစေချင်တာနဲ့
အသစ်နောက်ကိုလိုက်မပြေးစေချင်တာပါ
ဒါလေး ၂ခုပဲ ။
ရည်ရွယ်ချက် ဒါပဲမဟုတ်လား ။

အဲ့တော့
' ပူဇော်အထူးခံယူတော်မူထိုက်သောဘုရား '
အမြဲတမ်းသာ တဖွဖွနဲ့သာ နှလုံးသွင်းနေ
အဲဒါ ပုလင်းပတ်ကဆေးညွှန်းကို ဖတ်နေတာ ။

ဒါချည်းပဲရွတ်ပါများလာတော့
ကိုယ့်စကား ကိုယ့်နားကကြားသွားရင်
ကိုယ့်ကိုယ်ကိုပြန်မေးလိမ့်မယ်
' ဘာကြောင့် ပူဇော်အထူးကိုခံထိုက်တာလဲ '

သူများကမေးရင် ' မသိဘူးကွာ ' ပြောလိုက်
တစ်ခွန်းထဲပြောလို့ရတယ် ။

ကိုယ့်ကိုယ်ကိုမေးတော့ 
အဲ့လိုပြောလို့ရပါ့မလား ?
( မရပါ ဘုရား )

အဲ့တော့ မသိ 
သိအောင် လုပ်ရတော့မယ် ။

ဒို့ ဘုရားရှင်ကဲ့သို့အကျင့်မျိုး 
ဘယ်သူလိုက်ကျင့်နိုင်သလဲ ?
ဆိုပါစို့ ' ဒုက္ကရစရိယာ ' လိုဟာမျိုး
ဘယ်လိုလူ ကျင့်နိုင်သလဲ ?
နတ်တွေကော ကျင့်နိုင်သလား ?
ဗြဟ္မာတွေကော ကျင့်နိုင်သလား ?
အဲဒါကိုထားအုန်း ဒို့ 
ဒါက ကျင့်တဲ့ဘက်ကိုပြောတာ ။

ဒို့ ဘုရားဖြစ်မယ့်ဘဝမှာ 
သိဒ္ဓတ္ထမင်းသားထင်တယ် ။
နန်းမကြီး ၃ဆောင် 
မိဖုရားပေါင်းက ၁သိန်း ၂သောင်းရှိတယ် 
ရွှေအိုးကြီးလေးလုံးနှင့်တကွ 
ရှိသမျှပစ္စည်းတွေလည်း
မနည်းဘူး အတွင်းပစ္စည်းတွေ 
ကမ္ဘာအရပ်ရပ်ကဘုရင်တွေကကို 
လှမ်းဆက်သရတာ
ထင်တယ် ။

သူက စကြာမင်းဖြစ်မယ့်ပုဂ္ဂိုလ်
ဒီစကြာဝဠာတစ်ခုလုံးကြီးကို 
အုပ်ချုပ်နိုင်စွမ်းရှိတဲ့ဘုရင်
သာမာန်ဘုရင်မဟုတ်ဘူး ။

သူ့ရဲ့ဘုန်းကံကြောင့်လည်း 
တိုင်းပြည်မှာ
တစ်ဦးနှင့်တစ်ဦး 
လုယက်ခြင်း တိုက်ခိုက်ခြင်း
လိမ်ညာခြင်း 
မူးရူးရမ်းကားခြင်း မရှိတဲ့အတွက်
တရားစီရင်ရေးတွေလုပ်စရာမလိုပဲ
ဘုရင့်စည်းစိမ်သက်သက်ခံစားနေရတာကို
ဒို့ ဘယ်သူစွန့်နိုင်သလဲ ?

ဒို့ ရပ်ကွက်လူကြီးလေးလောက်တောင်
သူတက်မယ် ငါတက်မယ်ဖြစ်နေကြတာ 
ဟိုက တစ်ကမ္ဘာလုံးဗျ 
အခုလိုလည်းအရှုပ်အရှင်းမရှိဘူးဗျ 
ဘုရင့်စည်းစိမ်သက်သက်ခံစားရုံပဲ ။

အဲဒါတွေအကုန်စွန့်ပြီး 
ဘယ်သူတောထွက်ရဲသလဲ ?

နန်းတော်ကြီးနဲ့နေရပါများလို့ 
သုခကိုပယ်နိုင်တယ်
ထားအုန်း ဒုက္ခကိုခံနိုင်တဲ့
သတ္တိလည်းရှိသေးတယ်
နန်းတော်ကြီး ပယ်စွန့်ပြီး 
သစ်တစ်ပင်အောက်
ဘယ်သူနေရဲသတုန်း ?

ပြီးတော့ ဘုရင့်အစားအသောက် 
နုပေ့ကောင်းပေ့ဆိုတဲ့
အအီအဆိမ့်တွေပယ်ပြီး ဒီ သူများကလှူတဲ့
ထမင်းအကြမ်း ဟင်းကြမ်းကို ဘယ်သူစားရဲသလဲ ?

သုခကို ရိုးလို့ စွန့်နိုင်တယ်ထားအုန်း
ဒုက္ခကိုခံနိုင်ဖို့ သူ့လိုသတ္တိမျိုး 
လူလည်းမရှိဘူး
နတ်တွေမှာလည်းမရှိဘူး
ဗြဟ္မာတွေမှာလည်းမရှိဘူး ။

အဲ့တော့ ဗြဟ္မာမင်းကြီးတွေကလည်း 
'ငါ့ထက်သာတယ် '
နတ်မင်းကြီးတွေကလည်း ' ငါ့ထက်သာတယ် '
လူမင်းကြီးတွေကလည်း ' ငါ့ထက်သာတယ် ' 
ဆိုပြီး မပူဇော်ရဘူးလား ?

အဲ့တော့ လူမင်း 
နတ်မင်း ဗြဟ္မာမင်းတို့ကတောင်
ပူဇော်တယ်ဆိုရင် လူသာမာန် 
နတ်သာမာန်တွေက
ဘာပြောစရာလိုတုန်း ?
( မလိုပါ ဘုရား )

အဲ့တော့ ဘုရားဟာ 
ဒါ့ကြောင့် ပူဇော်အထူးကိုခံထိုက်တယ်လို့
ဆုံးဖြတ်ချက်ချပြီးရင် ဒီအဖြေရလာပြီဆိုရင်
ငါလည်းပဲ ဘုရားသားတော်
ငါလည်းပဲ ဘုရားသမီးတော်ဆိုပြီး
ကိုယ့်ဘက် 
လက်ညှိုးထိုးရတော့မယ်ထင်တယ် ။

ငါလည်းပဲ ဘုရားသားတော် 
သမီးတော်ဆိုပြီးတော့
ပုလင်းထဲကဆေးကို ဖော်သောက်မိအောင် 
အဲဒီဂုဏ်တော်တွေ ပွားခိုင်းတာ ။

ဘုရားက သူ နာမည်ကောင်းရအောင်
ပွားခိုင်းတာမဟုတ်ဘူး ။

ပုလင်းပတ်ကဆေးညွှန်းကိုဖတ်ပြီး
ပုလင်းထဲကဆေးကို သောက်ဖြစ်အောင်လို့
အဲဒီပုလင်းပတ်ကအညွှန်းကိုဖတ်ခိုင်းတာ
ဟုတ်ကဲ့လား ?
( မှန်ပါဘုရား )

(မဟာဗောဓိမြိုင်ဆရာတော်)
https://www.dhammaransi.com/index.php/new/2449-2018-09-01-16-12-08.html
--------
(သဗ္ဗဒါနံ ဓမ္မဒါနံ ဇိနာတိ)
-------
ဝယဓမ္မာ သင်္ခါရာ အပ္ပမာဒေန သမ္ပာဒေထ
ပြုပြင်ထားသည့် သင်္ခါရ တရားမှန်သမျှသည်
ပျက်စီးခြင်းလျင် နိဂုံးရှိသဖြင့် မမေ့မလျော့သော
သတိတရားဖြင့် ကိုယ်စီကိုယ်ငှ ပြည့်စုံကြလော့။
-----------
ကောင်းမှုမြတ်နိုး ကောင်းအောင်ကြိုး၍
ကောင်းကျိုးကိုယ်၌ တည်ပါစေ
#ဝေလင်းထိုက်
----------------- 
တစ်နေ့နေ့တစ်ချိန်ချိန် ကျွန်တော်လူ့လောကကြီးကနေထွက်ခွာသွားတဲ့အခါ ကျွန်တော်မှတ်သားထားတဲ့ တရားဓမ္မ တွေ အသိပညာတွေဆက်လက်ရှင်သန်ပြီးလူ့လောကအတွက် အကျိုးဖြစ်ထွန်းစေချင်ပါတယ် စိတ်ချမ်းသာ ကိုယ်ကျန်းမာကြပါစေ